文/尹大为

　　据讲，李宇春个歌迷叫做“玉米”。吾先生陈丹青现在开博客，招来一帮“粉丝”，自称“青丝”。
　　迭眼“青丝”看到陈丹青来了央视做节目，讲一句，底下头“轰”笑一句。伊拉来了留言里厢写：“我太喜欢你了！”
　　迭个纪录片吾也看过，好像是来了大学里，伊讲个是北方闲话，下头坐勒嗨个学生子，个个伸长头颈，“High”得要命。伊来了北京读大学，后来搞一帮北方艺术家混勒一淘，加许多日脚下来，不仅北方闲话一眼没问题，就是特别个俗语、切口也熟得一塌糊涂。尤其当众演讲，抑扬顿挫，灵得一塌糊涂。交关人当知伊是北方人。
　　陈丹青来上海出差，阿拉《三人麻辣烫》那能好错过呢？伊讲上海闲话是另外一种味道，邪气放松，用词鲜龙活跳，比伊讲普通话还赞。八过，吾心里么底，不晓得伊上电视讲上海闲话，出勿出彩？“青丝”们会不会讲：“吾吃死脱侬了”？
　　话题是小辰光谈朋友个事体。灯光一开，摄像机一转。林栋甫问伊：“侬多少大开始谈朋友？”
　　陈丹青讲：“我谈朋友老晚个，要到进大学以后来。”
　　林栋甫追问：“各么，小辰光呢？”
　　“小辰光么……”陈丹青老认真个想了想，“我是———戆大一只！”
　　全场“轰”地一记笑翻，气氛马上松下来。
　　录好一只，再录一期谈胡戈（当时凯歌爷叔刚刚要告伊）。
　　勿晓得陈丹青会哪能讲？
　　林栋甫讲好开场白，陈丹青勒么生头来了一句：“我就是胡戈！”
　　吾吓了一跳。陈丹青勿慌勿忙讲下去：“十几年来，吾做个事体搞胡戈一样个，吾基本上赞是用世界美术史重要个画，全部一式一样画出来。然后拿伊重新剪接，拼贴。吾到现在还来勒做迭个事情……”原来是迭能。
　　陈丹青话锋一转：“吾现在个学生赞是迭能个，所以吾最后发觉伊拉赞是吾个老师。就是伊拉来勒教吾。”
　　真勿敢想，迭个人个画已经卖到四百多万……
　　林栋甫接下去讲：“有一趟人家问导演张建亚：‘你是第五代导演，对第六代导演有什么寄语？’伊讲：‘让我讲他们你应该怎么？他们带我玩就蛮好了！’”
　　陈丹青马上跟进：“就像阿拉小辰光弄堂里白相，‘侬阿吾伐（你带我玩吗）？’侬勿阿吾———哭煞！”
　　全场又笑翻。
　　几年前，吾好朋友写过一篇《难以消化的陈丹青》。又是几年过去了，陈丹青还是消化勿脱。